'TILL DEBT DO US PART

May nagtanong sa akin kung ano daw ang mangyayari kung namatay ang credit card holder.

Naiisip kasi ng ordinaryong Pilipino na namamana ang utang.

Magandang balita ulit sa mga may utang…Hindi ito totoo.

Ang utang ni Pedro ay utang ni Pedro at hindi utang ni Juan. Ang utang ng mga magulang, anak, kapatid, tito, tita, lolo, lola at pati kapitbahay at ang alaga niyang aso ay hindi pwedeng singilin sayo.


ANG UTANG AY UTANG PARIN

Hindi nga pwedeng ipasa ang utang mo sa mga kamag-anak mo at sa ibang tao pag-ikaw ay pumanaw na, ngunit may utang ka pa ring dapat bayaran.

Pero sino ang sasalo sa utang mo kung isa ka nang fertilizer ng lupa?

Ang iyong mga ari-arian o estate.

Tama nga ang kasabihang – Hindi mo madadala sa libingan ang iyong mga pera at ari-arian.

Sa katunayan, pwede ka pa ring idemanda ng pinakakautangan mo kahit patay kana pero syempre, ito ay nakatukoy sa iyong mga naiwang ari-arian. Kaya nga ang pamagat ng kaso ay tulad ng ganito: Citibank vs. The Estate of the Late Juan Dela Cruz.

Mapupunta muna ang mga naiwan mong ari-arian na pambayad sa mga utang mo at kung may natira pa ay saka ito pagpaparti-partihin ng mga tagapagmana o heirs.

Kaso, karamihan naman sa mga Pilipino ay wala namang sapat na ari-arian kahit nung nabubuhay pa, kaya sa huli, hindi rin nakakasingil ang mga creditors, kaya lista mo na lang sa tubig ang utang mo.

“He that dies pays all debts” –  William Shakespeare

2 responses to “'TILL DEBT DO US PART

  1. Ah ok pala, ‘di na ako matatakot sa may utang sa akin, mayroon naman siyang ari-arian. ‘di ko alam kung papaunlakan ninyo itong tanong ko, pero itutuloy ko na rin (sana walang bayad), Paano kung mahigit 3 taon nang ‘di nakakabayad ng utang, pero mayroon namang collateral na titulo ng lupa ang umutang sa akin, at malabo na siyang makabayad sa panahon naito, may karapatan ba akong sabihin sa kanya na ako na muna ang magmamani-obra ng lupa niya hanggat hindi pa siya nakakabayad?
    Pagpasensyahan po ninyo ang paglalakas ko ng loob na ito na magtanong.
    Salamat.

  2. Ferdz,

    Kapag may written contract kayo ng umutang sayo at pirmado niya, may 10 taon ka pa para maghabla.

    Kung pinapirma mo siya ng kontratang may titulong “Real Estate Mortgage” (REM) ay pwede mong i-subasta (foreclose) ang lupa.

    Extra-judicial foreclosure (mas mabilis) kung may special power of attorney (SPA) na kasama sa REM at judicial foreclosure (mabagal) kung wala.

    Ibebenta ng sheriff ang lupa sa publiko (Public Bidding). Pwede ka mag-bid at yung utang niya sa iyo ang pambayad mo (off-set). Kung walang ibang bidder, panalo ka at ililipat sa titulo mo ang lupa (sa iyo na!).

    Kung may mag-bid na iba ay tatapatan niya ang bid mo at dapat bayaran niya ng cash sa sheriff. Yung pinambayad ay ibibigay sa iyo bilang pambayad ng utang sa iyo ang sobra (kung meron pa) ay ibabalik sa may-ari ng lupa.

    Either way, panalo ka pa rin.

    Bawal kasi na basta mo na lang kukunin ang sinanla sa iyong lupa na walang bidding kahit nakalagay pa sa kontrata, pactum commissorium tawag dun.

    Kung walang kontrata ay may 6 years ka lang para mag-file ng case laban sa kanya for sum of money.

    Advice ko para mabilis at dacion en pago na lang (off-setting). Pa-execute mo na lang siya ng deed of sale pabor sa iyo (ikaw buyer, siya seller) at ang bayad mo yung utang niya. Kung maliit lang halaga ng utang, e dagdagan mo na lang.

    Hope this helps.